Friday, 16 October 2015

தஞ்சை பெரிய கோவில்


தஞ்சை பெரிய கோவிலின் 1000 ஆண்டுகள் நிறைவு பெறுவது முன்னிட்டு இந்தப் பதிவு. "எழுத்துச் சித்தர்" பாலகுமாரன் கைவண்ணத்தில்:

அந்தக் கோவில் கட்டுமானத்தில் சுடு செங்கல் இல்லை. மரம் இல்லை. சொறிகல் என்ற பூராங்கல் இல்லை. மொத்தமும் கருங்கல். நீலம் ஓடிய, சிவப்பு படர்ந்த கருங்கல். உயர்ந்த கிரானைட். இரண்டு கோபுரங்கள் தாண்டி, விமானம் முழுவதும் கண்களில் ஏந்திய அந்தக் கோவிலின் நீளமும், அகலமும், உயரமும் பார்க்கும்போது, வெறும் வண்டல் மண் நிறைந்த அந்தப் பகுதிக்கு இத்தனை கற்கள் எங்கிருந்து வந்தன, எதில் ஏற்றி, இறக்கினர், எப்படி இழுத்து வந்தனர், எத்தனை பேர், எத்தனை நாள், எவர் திட்டம், என்ன கணக்கு???

இந்தக் கருங்கற்களை செதுக்க என்ன உளி, என்ன வகை இரும்பு, எது நெம்பி தூக்கியது, கயிறு உண்டா, கப்பிகள் எத்தனை, இரும்பு உண்டெனில், பழுக்கக் காய்ச்சி உரமேற்றும் உத்தி (Heat Treatment) தெரிந்திருக்க வேண்டுமே. இரும்பை சூடாக்கி எதில் முக்கினர். தண்ணீரிலா, எண்ணெயிலா. நெருப்பில் கனிந்த இரும்பை எண்ணெயில் முக்கும் கலை (oil quenching) ஆயிரம் வருடங்களுக்கு முன்பே உண்டா. எத்தனை பேருக்கு எவ்வளவு சாப்பாடு. அரிசி, காய்கறி எங்கிருந்து. சமையல் பாத்திரம் எத்தனை. படுத்துறங்க எங்கு வசதி. மறைவு வசதிகளுக்கு நீர்த்துறை எது???

மனிதருக்கு உதவியாய், யானைகள், மாடுகள், குதிரைகள், கழுதைகள் உண்டெனில், அதற்கு உணவும், அவற்றைப் பழக்கி உபயோகப்படுத்துவோரும் எத்தனை பேர். அத்தனை பேரும் ஆண்கள் தானா. கோவில் கட்டுவதில் பெண்களுக்கும் பங்குண்டா. தரை பெருக்கி, மண் சுமந்து, பளு தூக்குவோருக்கு மோர் கொடுத்து விசிறிவிட்டு, இரவு ஆட்டம் ஆடி, நாடகம் போட்டு, பாட்டு பாடி, அவர்களும் தங்கள் பங்கை வழங்கியிருப்பரோ. இத்தனை நடவடிக்கையில், உழைப்பாளிகளுக்கு காயம் படாதிருந்திருக்குமா. ஆமெனில், என்ன வைத்தியம். எத்தனை பேருக்கு எவ்வளவு வைத்தியர். இத்தனை செலவுக்கும், கணக்கு வழக்கென்ன, பணப்பரிமாற்றம் எப்படி. பொன்னா, வெள்ளியா, செப்புக்காசா. ஒரு காசுக்கு எத்தனை வாழைப்பழம். என்னவித பொருளாதாரம். உணவுக்கு எண்ணெய், நெய், பால், பருப்பு, மாமிசம், உப்பு, துணிமணி, வாசனை அணிகலன்கள் இருந்திருக்குமா. பாதுகாப்பு வீரர்கள் உண்டா. வேலை ஆட்களுக்குள் பிரச்னையெனில், பஞ்சாயத்து உண்டா. என்ன வகை சட்டம். எவர் நீதிபதி. இவை அத்தனையும், ஒரு தனி மனிதன், ஒரு அரசன் நிர்வகித்தானா. அவன் பெயர் தான் அருண்மொழி என்ற ராஜராஜனா.

யோசிக்க யோசிக்க, மனம் மிகப் பெரிதாய் விரிவடைகிறது. இது கோவிலா. வழிபாட்டுத் தலமா. வெறும் சைவ சமயத்துக்குண்டான கற்றளியா. இல்லை. இது ஒரு ஆற்றங்கரை நாகரீகத்தின் வரலாற்றுப் பதிவு. தமிழ் மக்களின் அறிவுத் திறமைக்கு, கற்களால் கட்டப்பட்டத் திரை. காலம் அழிக்க முடியாத சான்றிதழ். காவிரிக்கரை மனிதர்களின் சூட்சம குணத்தின் வெளிப்பாடு. விதவிதமான கலைகளின், மனித நுட்பத்தின் மனத் திண்மையின் ஒருமித்த சின்னம். முப்பத்தாறு அடி உயர ஒற்றைக்கல், இருவர் கட்டிப்பிடிக்க முடியாத அகலம். இதுபோல பல கற்கள், முன்பக்க கோபுரங்களிலும் தாங்கு பகுதியாக இருக்கிறது.

திருச்சிக்கு சற்று தெற்கே உள்ள கீரனூர் தாண்டி இருக்கிற நார்த்தாமலையிலிருந்து வந்திருக்கிறது. கிட்டத்தட்ட அறுபது கிலோ மீட்டர். எப்படி கொண்டு வந்தனர் இவ்வளவு பெரிய கற்பாறைகளை. பல்சகடப் பெரு வண்டிகள். பல சக்கரங்கள் பொருத்தப்பட்ட வண்டிகள், மாடுகள் இழுத்தும், யானைகள் நெட்டித் தள்ளியும் வந்திருக்கின்றன. அந்த வழியில் ஒரு ஆறு கூட இல்லை. மலை தாண்ட வேண்டாம். மணல் பகுதி இல்லை. சரியான, சமமான பாதை. வழியெல்லாம் மரங்கள். அந்த நார்த்தாமலையில், ஆயிரம் வருடத்துக் கோவிலும் இருக்கிறது. வெட்டிய இடத்திலேயே வேண்டிக் கொள்ள கோவில் கட்டியிருக்கின்றனர்.

எப்படி மேலே போயிற்று. இத்தனை உயரம். விமானம் கட்டக்கட்ட, வண்டிப்பாதையை கெட்டியான மண்ணால் அமைத்திருக்கின்றனர். இரண்டு யானைகள் எதிரும், புதிருமாய் போவதற்கான அகலத்தில் கற்பலகைகள், மனிதர்களாலும், மிருகங்களாலும், மேலே அந்த சுழல் பாதையில் அனுப்பப்பட்டன. உச்சிக்கவசம் வரை வண்டிப்பாதை நீண்டது. அதாவது, கலசம் பொருத்தும்போது, விமானம் வெறும் களிமண் குன்றாய் இருந்திருக்கும். பிறகு...? மெல்ல மெல்ல மண் அகற்றப்பட்டிருக்கும். ஆயிரக்கணக்கானவர்கள் தினமும் மண் அகற்றி, தொலைதூரம் போய் குவித்திருக்கின்றனர். குவிக்கப்பட்ட இடம் இப்போதும் இருக்கிறது. "சாரப்பள்ளம் என்ற இடத்திலிருந்து சாரம் அமைத்து' என்று சொல்கின்றனரே... வாய்ப்பே இல்லை. அத்தனை உயரம் சாரம். கற்பாறைகளைத் தாங்கும் கனத்தோடு கட்டப்பட்டிருக்காது. சாத்தியமே கிடையாது. நொறுங்கி விழுந்திருக்கும். அப்படியானால் சாரப்பள்ளம். சாரம் போட, அதாவது மண்பாதை போட மண் தோண்டப்பட்ட இடம் பள்ளமாயிற்று. சாரம் போட தோண்டப்பட்ட போது உண்டான பள்ளம் சாரப்பள்ளம். இத்தனை மனிதர்கள் எப்படி. உழைப்பாளிகள் எங்கிருந்து.

வேறெதற்கு போர்? பாண்டிய தேசம், சேர தேசம், இலங்கை, கீழ சாளுக்கியம், மேல சாளுக்கியம் என்று பரவி, எல்லா இடத்திலிருந்தும், மனிதர்களும், மிருகங்களும், பொன்னும், மணியும், மற்ற உலோகங்களும், அதற்குண்டான கைவினைஞர்களும் இங்கே குவிக்கப்பட்டிருக்கின்றனர். கோவில் கட்ட போரா; போர் செய்து ஜெயித்ததால் கோவிலா. இரண்டும் தான். சோழர்கள் போர் செய்யப் போகவில்லை எனில், பாண்டியர்கள் மேலை சாளுக்கியர்கள் போர் துவக்கி ஜெயித்திருப்பர். (வெகு காலம் கழித்து ஜெயித்தனர்.) எனவே, எதிரியை அடக்கியது போலவும் ஆயிற்று, இறைபணி செய்தது போலவும் ஆயிற்று. இது சோழ தேசத்து அரசியல் சாணக்கியம். கல் செதுக்க விதவிதமான சிற்பிகள். மேல் பகுதி நீக்க சிலர். தூண், வெறும் பலகை, அடுக்குப்பாறை செய்ய சிலர். அளவு பார்த்து அடுக்க சிலர். கருவறைக் கடவுள் சிலைகள் செய்ய சிலர் என்று பலவகையினர் உண்டு. உளிகள், நல்ல எக்கு இரும்பால் ஆனவை. பெரிய கல் தொட்டியில் எண்ணெய் ஊற்றி, பழுக்க காய்ச்சிய உளிகளை சட்டென்று எண்ணெயில் இறக்க, இரும்பு இறுகும். கல் செதுக்கும் கோவிலுக்குள், இப்படிப்பட்ட கல்தொட்டி இன்னும் இருக்கிறது. கயிறு, கம்பிகள் சிறிதளவே பயன்பட்டன. உயரப் பலகைகள் போட மண் உபயோகப்பட்டது.

எல்லா ஊரிலிருந்தும், தஞ்சைக்கு உணவு தானியங்கள் வந்திருக்க வேண்டும். ஆடுகள் அனுப்பப்பட்டிருக்க வேண்டும். ஆடுகள் வளர்ப்பது ஒரு கலையாக, கடமையாக இருந்திருக்கிறது. "சாவா மூவா பேராடுகள்' என்ற வாக்கியம் வழக்கத்தில் இருந்திருக்கிறது. 96 ஆடுகள் இருப்பினும், அந்த ஆட்டுக் கூட்டம் குறையாது. குட்டி போட்டு வளரும். வளர்க்கப்பட வேண்டும். நல்ல மருத்துவமனைகள் கட்டப்பட்டிருக்கின்றன. விதவிதமான மருந்துப் பெயர்கள் பட்டியலிடப்பட்டிருக்கின்றன. அறுவை சிகிச்சை தெரிந்தவர்கள் இருந்திருக்கின்றனர். மருத்துவமனை சார்ந்த தொழிலாளர்கள் உண்டு. மருந்துக் கிடங்கு உண்டு. மூலிகை தேடி சேகரிப்போர் உண்டு. நீர் ஊற்றுபவர் உண்டு. கணக்கு வழக்குகள், ஓலைச் சுவடிகளில் பதிவு பெற்றிருக்கின்றன. துல்லியமான கணக்கு வைக்கப்பட்டிருக்கிறது. தானங்கள் கல்வெட்டாய், குன்றிமணி தங்கம் கூட பிசகாமல் செதுக்கப்பட்டிருக்கின்றன. இதைச் சொல்ல ஒரு ஆள். செதுக்க ஒரு ஆள். நேர் பார்க்க ஒரு ஆள். வீரர்களுக்குள் சண்டை நடந்ததெனில், பஞ்சாயத்து நடந்ததற்கான கல்வெட்டுகள் உண்டு.

மாமன்னர் ராஜராஜன் கண்ட விற்போர் உண்டு. ஒண்டிக்கு ஒண்டி சண்டை செய்ய விட்டிருக்கின்றனர். (Duel). இதில் ஒருவன் தப்பாட்டம் ஆடி இருவருமே இறந்ததால், இருவரின் மனக்கேதமும் தீர்க்க, கோவில் விளக்கெரிக்க வேண்டி, யார் மனஸ்தாபத்திற்குக் காரணமோ, அவர்களுக்கு அபராதம் விதித்திருக்கின்றனர். 96 ஆடுகள் அபராதம். அதாவது, சாவா மூவா பேராடுகள். தஞ்சையிலுள்ள ஒரு கோவிலில் இக்கல்வெட்டு இருக்கிறது.

கோவில் கட்டியாகி விட்டது. நிர்வகிக்க யார் யார். அவருக்கென்று வீடு ஒதுக்கி, வீட்டு இலக்கம் சொல்லி, பெயர் எழுதி, கல்வெட்டாய் வெட்டியிருக்கிறது. இடது சிறகு மூன்றாம் வீடு, நக்கன் பரமிக்கு பங்கு ஒன்றும், இடது சிறகு நான்காம் வீட்டு எச்சுமண்டைக்கு பங்கு ஒன்றும் என்று பல நூறு பெயர்கள் செதுக்கப்பட்டிருக்கின்றன. வீணை வாசிக்கும் ஆதிச்சன் இறந்தமையால், அவன் மகனுக்குப் பங்கு அரையும் என்று சம்பளம் குறைக்கப்பட்டிருக்கிறது. கோவில் பணியில் உள்ள எல்லா தொழிலாளர்கள் பெயரும், தொழிலும் எழுதப்பட்டிருக்கின்றன. அது மட்டுமல்ல, கோவிலுக்கு யார் தானம் தந்தனரோ, அவர்கள் தந்தது சிறு தொகையானாலும், பெரிய தொகையானாலும், தங்க ஆபரணமானாலும், கல்லில் வெட்டப்பட்டிருக்கிறது. முதல் தானம் ராஜராஜனுடையது. "நாங்கொடுத்தனவும், நம் அக்கன் கொடுத்தனவும், நம் பெண்டுகள் கொடுத்தனவும்' என்று கல்வெட்டு துவங்குகிறது. தான் மட்டும் இக்கோவிலைக் கட்டியதாய் ஒரு சிறு நினைப்பு கூட அந்த மாமனிதனுக்கு இல்லை. கோவில் கட்டிய இந்த மனிதர்கள் எப்படி இருப்பர். கொஞ்சம் தெரிய வருகிறது.

விமானத்தினுள்ளே உயிர் ஓவியங்கள் உள்ளன. சட்டை அணிந்த தளபதிகள், இடுப்பில் பாவாடையும், மேல் போர்வையும் அணிந்த அரசிகள், இடதுபக்க பெரிய கொண்டையோடு, தாடியோடு மாமன்னர் ராஜராஜன், அலங்காரமான, மிக அழகான கறுப்பு, சிவப்பு, மாநிறம் கொண்ட தேவரடியார்கள் என்று அழைக்கப்பட்ட நடனமாதர்கள், சிதம்பரம் கோவில் நடராஜர், விதவிதமான முகங்கள்; ஒன்று போல் ஒன்று இல்லை. உயிர் ததும்பும் முகபாவங்கள். தட்டை ஓவியங்கள். ஆனால், தெளிவாகத் தெரியும் ஒரு உலகம். மாமன்னர் ராஜராஜனைக் கோவில் கட்டத் தூண்டியது எது. போரா கலைஞர்கள் செய்திறனா. இல்லை. பெரிய புராணம் என்ற திருத்தொண்டர் புராணம் முக்கிய தூண்டுதல். கோபுர வாசலில் உள்ள சுவர்களில், சிறிய சிறிய சிற்பங்கள் தெரிகின்றன. கண்ணப்ப நாயனார், பூசலார், கண்டேஸ்வரர் மன்மத தகனம் என்று, முக்கால் அடி உயர பதுமைகளைச் செதுக்கி வித்தை காட்டியிருக்கின்றனர். அடுத்த விநாடி குழந்தை பிறக்கும் என்ற தாயின் உருவம், மன்னர் முகங்கள், புராண காட்சிகள் எல்லாம், கோவில் கோபுரங்களில் உண்டு.

இது என்னவித கோவில்- விமானம் உயரம். மிக உயரம். கோபுரங்கள் சிறியவை. இது ஆகம விதியா. புதிய சிற்ப சாஸ்திரமா. உள்ளே நுழைந்ததும் நந்தியை மனதால் அகற்றிவிடுங்கள். எதிரே உள்ள விமானம் தான் சிவலிங்கம். வானம் ஒரு சிவலிங்கம். விமானத்திற்குள் உள்ள வெளி ஒரு சிவலிங்கம். வெளிக்கு நடுவே கருவறையில் கருங்கல் சிவலிங்கம். எல்லாம் சிவமயம். இந்த விமானத்திற்கு மாமன்னர் ராஜராஜன் வைத்த பெயர், "தென்திசை மேரு!' உள்ளே கடவுள் பெயர் பிரகதீஸ்வரர். தமிழில் பெரு உடையார். வடக்கே உள்ள கைலாயத்தின் மீது காதல். கைலாயம் போகவில்லை. கைலாயத்தை இங்கே கொண்டுவந்துவிட்ட உடையார் பெரிய உடையார், இது போதுமா கடவுளைச் சொல்ல. ரொம்ப பெரிசு ஐயா கடவுள். கருவறைக்கு அருகே உள்ள துவாரபாலகர் கட்டுகிறார். பதினேழு அடி உயரம். அவர் கால், கதை, கதையைச் சுற்றி மலைப்பாம்பு. மலைப்பாம்பு வாயில் பெரிய யானை. அதாவது, யானையை விழுங்கும் பாம்பு. பாம்பு சுற்றிய கதை. கதையில் கால் வைத்த துவாரபாலகர், அவர் கை விஸ்மயம் என்ற முத்திரை காட்டுகிறது. உள்ளே இருப்பதை விவரிக்க முடியாது என்று கை விரிக்கிறது. விவரிக்கவே முடியாத சக்திக்கு, கடவுளுக்கு, தன்னாலான அடையாளம் காட்டியிருக்கிறார் மாமன்னர் ராஜராஜன். அதுவே பிரகதீஸ்வரம். அதுவும் விஸ்வரூபம், இன்றும், என்றென்றம் !!

ஏழு உலக அதிசயங்களையும் மிஞ்சிய அதிசயம் நம் முப்பாட்டன் ராஜராஜசோழன் ஆயிரம் வருடங்களுக்கு முன் கட்டிய தஞ்சைப் பெரிய கோவில்.......... தமிழனின் பெருமையை அனைவரும் பகிர்வோம்

Friday, 17 May 2013


Should be Personal , Why ?



மே வணக்கங்கள் !!!

சித்திரையில் "பிறந்த" சில்வண்டு இவளுக்கு , தங்களது வாழ்த்துக்கள் சேர்ந்த பின் சற்று சிறகு முளைத்திருப்பது உண்மைதான்... வரலாறு கண்டு கடுப்போடு களிப்புற , வரையறை இன்றி இனிமைகள் அனுபவித்தாயிற்று என் வாழ்வில் !! அத்தனையும் உங்கள் பொறுமைக்கும் , சகிப்புத் தன்மைக்கும் கிடைத்த வெற்றி தான் !!! இவளை தாய்க்கு அடுத்து நேசிப்பதற்கும் , தந்தைக்கு அடுத்து திசை படுத்துவதற்கும் நன்றிகள் கோடி Friends !!!!


Saturday, 4 May 2013



காலத்தால் களவாடப்பட்டு கண் விழித்து ஓடிவந்தேன் "Blog" எழுதிட :)...

மனிதர்கள் குறித்து பிதற்றி கொண்டிருந்தேன் !!! இதில் , இன்னுமொரு முக்கிய நபர் குறித்து கூறும் முன் .... என் தஞ்சை தரணியை முத்தமிட எத்தனித்து ஓடபோகிறேன் !!!

தொல்லைகள் தொடரும் !!!

Thursday, 21 February 2013

உலகம் இயைந்திருப்பது காதலால் என்றால் , நான் "உறவுகளுக்குள் இருக்கும் பிரிவு பயத்தால் !!" என்பேன் !

என்னை அப்படிப் பிரிந்து சென்று , கலங்க செய்தவள் இவள் .......
ஆம் , என்னால் மறக்க இயலாத இன்னும் சில உயிர்களுள் , நரை கூடியும் முத்தக்காட்சிகளில் தன் கணவனை கண் கலங்க நினைத்து தற்கால சினிமா வையும் ரசித்து , ஏதோ "திருமுருகன்" இவள் கதையை திருடி தொடர்புனைவது போல் , அதட்டிக்கொண்டும் , அழுதுக் கொண்டும் .........தள்ளாத வயதிலும் "ஏண்டி , அந்த சன் - ஏ வச்சா என்ன ? குடும்ப கதையலாம் பாக்காம தான் இப்டி தறிகெட்டு திரியிறீங்க !!" என்றுத் திட்டிக் கொண்டே என்னிடம் மல்லுக்கு நின்று , சில்-சித்திரமும் கண்டு வாழ்ந்தவள் .... என் 70 வயது தோழி "என் அம்மாச்சி".... இப்போது அவள் அவனைத் தேடி , நெடுதூரம் பயணம் போனது என் குழந்தையின் துரதிஷ்டம் !!! 12-ல் , மணம் கண்டு , 13 - ல் தாயாகி 72-லும் குழந்தையாக என் கண்ணிற்கு தெரிந்தமைக்கு , அவளது பட்சமில்லா அன்பும் , கபடமில்லா பரிவும் தான் என்பேன் !!!. மலையாள தமிழில் அவள் அழகு வார்த்தைகள் கேட்க என் செவியும் மனமும் இன்றும் கண்ணீரோடு ஏங்குவது அவளுக்கு புரியுமா????? நம் சமுதாயம் , பாட்டன் தாத்தா சொத்துக்கு தரும் மதிப்பை , அவர்களுக்கும் கொடுத்தால் , நம் சந்ததியும் அறம் வளர்பவர்கள் தான் ????

Monday, 28 January 2013

தாய் தாசியாக்கப்பட்டாள் ???


நெடு நாள் இவள் தொல்லை இன்றி நிம்மதியாய் இருந்தோம் என்பவர்களுக்கு.... இம்சை இவளின் அன்பான வணக்கங்கள் !!! :-)

எவனோ ஒருவனுக்காக நீ உருகியது எனக்கு எதுக்குடி என்று அங்கலாய்க்கும் அன்பர்களே !!!, சுதந்திர இந்தியாவில் சுயபுராணம் பாட வகை உண்டெனும் போது , அக்கம் பக்கம் கிசு கிசு பேசுவதில் பேர்போன
நமக்கு இனாமாக கிடைக்கும் , பிறர் வாழ்கை சுவாரஸ்யங்கள் படிக்க வகை பூணாதா என்ன ???? நான் என் செல்ல நண்பர்களைக் கூறவில்லை !!! :-)

என் தந்தையின் மிரட்டலுக்கு பயந்து , வீடையே காலி செய்து போன " சோழ நாட்டு" வீரனைப் பாராட்ட இன்னும் தேடிக்கொண்டே இருக்கிறேன் , கிடைக்காமல் தீவிரவாதம் செய்கிறான் , கனவில் மட்டும் !!!
எப்படியோ பன்னிரெண்டாம் வகுப்பை காலி செய்து , கல்லூரி பயணிக்கும் கனவோடு திரிகையில் தான் உலகம் " தன் உக்கிரம்" காட்டி பயமுறுத்தியது. என் தாய் , கழனியில் மிதக்கும் அரிசி பருக்கைகளை கூட , அலேக்காக சுத்தம் செய்து சாப்பிட எத்தனித்த தருணங்கள் என்னிடம் , பகர்கையில் தான், "வறுமை " எனும் வார்த்தையே முதலில் என் வாழ்கையில் வந்தது. இந்த இடத்தில கண்டிப்பாக என்னை முதன் முதலில் , அருவருப்போடு அன்பையும் குழைத்து , உலகில் எதுவுமே "சரி தவறு இல்லை!" என்னும் , கொடுமையான உண்மையை உணர்த்தியவள் பற்றி கூற ஆசைபடுகிறேன்.

அவள் !

சிங்காரமாய் சிகை முடித்து, சின்ன பெண்ணைப் போல் தன்னை வெளிக்கொணர அரும்பாடுப் பட்டு , ஊர் தன்வேலை பார்த்தாலும் , தன்னைத் தான் தூற்றுதோ என தெருவில் கூனிக் குறுகி..., தெரியாதவர் முன் கூட "தெரிந்தவள்" போல் சிணுங்கி .... வயது 40-யை கடந்த வடுக்களை , பவுடர் பூசி மெழுகி , வயோதிக வாழ்க்கையிலும் வயிற்றுக்காய் வாழ்வில் (40 - லும் தன்னை வாலிபர் என நினைத்து வாழும் மாமா-வாலிபர் ) பலருக்கு வசிய மங்கையாய் வாழ்ந்து வருபவள் !!!!! அவள் ....... உடல் கரை படிந்திடினும், உள்ளம் கொஞ்சம் உஜாலா வெள்ளை தான் !!! அவள், கூறிய உண்மை என்ன ? !!!! அடுத்து எழுதுகிறேன் .............


Friday, 11 January 2013


தேடிச் சோறுநிதந் தின்று - பல
சின்னஞ் சிறுகதைகள் பேசி - மனம்
வாடித் துன்பமிக உழன்று - பிறர்
வாடப் பலசெயல்கள் செய்து - நரை
கூடிக் கிழப்பருவ மெய்தி - கொடுங்
கூற்றுக் கிரையெனப்பின் மாயும் - பல
வேடிக்கை மனிதரைப் போலே - நான்
வீழ்வே னென்று நினைத் தாயோ?

பாரதியோடு சேர்ந்து , நான் சொல்லும் "இனிய பொங்கல் வாழ்த்துக்கள் "...

Friday, 14 December 2012

Padichu parunga purinja continue.....




என்னுடைய பயணம் ஆரம்பித்த கரந்தை தமிழ் சங்கத்தில் தான் , எனக்கு உண்மையான வாழ்கையும் புரிந்தது !!!
"யுவ கேந்திரா ", தின தந்தி யின் "இளங்கவி", "புதுமை பெண்கள்" ,அரட்டை அரங்கம், அகட விகடம் என பலவற்றில் பங்கேற்று புகழ் பெற்று வளர்ந்து வருகையில் ,.........( தலைகனத்தில் )..... "நீ தமிழுக்கு லாயிக்கு இல்லை... முதலில் தமிழ் பயின்று பின் அதனை நேசிக்க கற்று , அதில் நீந்த பழகி பின்னர் மேடை ஏறு " எனும் வார்த்தைகள் இடியை இறக்கியது என் இதயத்தில் !!!!..... அதன் அர்த்தம் புரியும் முன்னர் , கோபம் தலைகேறி அவளை தூஷிக்க துவங்கினேன். என்னிடம் பல சாபம் பெற்று, இன்று தமிழ் பேராசிரியை ஆக , தமிழ் சங்கத்தில் பணி புரிந்து , நல்லாசிரியர் பட்டம் பெற்று இன்றும் திட்டி , திருத்தி தமிழை ,வாழவைத்து கொண்டிருக்கும் அவள் ...... என் பிரிய " தமிழ் ஆசிரியை " ஜெய ஸ்ரீ".... 5 ஆண்டுகள் சென்று , அவர் கையால் நான் பெற்ற " ஒற்றை " சான்றிதழ் தான்............. எனக்கு கிடைத்த அலாதி "Award ". :-).... ஆம், அவளால் தான் " என்னை அறிந்தேன் , உலகை உணர்ந்தேன் , தமிழை புரிந்தேன் ". பல்கலை கழக "தங்க பதக்கம் " கூட , தலையில் சுமை ஏற்றாது , பவ்யமாய் வாழ பழக்கியவள். இன்னும் இன்னும் தேடி கற்று கொண்டிருக்கிறேன். ஆனால் , அவள் திட்டிய காரணம் ???